Спортны яратабыз

     Гаиләбездә өлкәннәр дә, балалар дә спортны яратабыз. Даими шөгыльләнеп кенә калмыйбыз, мәктәптә,авылда һәм районда үткәрелгән спорт ярышларында актив катнашабыз да әле. Әтием армрестлинг,әнием җиңел атлетика,туризм төрләрен үз итә. Абыем мәктәптә укыган елларында мәктәбебезнең иң яхшы спортчыларыннан берсе булды, хәзер дә спорттан аерылмый. Спортның бик күп төрләре буенча уңышларга иреште. Кечкенәдән үк районда үткәрелгән чаңгы ярышларында катнашып призлы урыннар яулады. Җәйге һәм кышкы туризм, волейбол, баскетбол, гандбол ярышларында команданың иң оста уенчыларыннан берсе булса, Гимазетдин Вәҗетдинов, Днепров призына район ату ярышларында, тормыш иминлеге буенча район олимпиадаларында төрле елларда күп тапкырлар беренчелекне яулады. Тормыш иминлеге фәне буенча республика олимпиадасында катнашты. Мәктәптә һәр ел саен Әфганстанда һәлак булган батыр авылдашыбыз Илфар Фаррахов призына үткәрелеп килгән хәрби спорт төрләре ярышында кубок иясе булды.

  Мин дә абыемнан калышмаска тырышам. Мәктәпнең волейбол, баскетбол командасы составында ярышларда катнашам. Физкультура,тормыш иминлеге нигезләре һ.б. буенча район олимпиадаларында катнашып, призлы урыннан алам.